O vicepresidente da Deputación, Xosé Regueira, recibe un dos premios da Gala do Turismo e a Gastronomía de Galicia

O deputado de plans provinciais e turismo, Xosé Regueira (BNG)

O vicepresidente da Deputación da Coruña, o deputado do BNG Xosé Regueira, recibirá o vindeiro 25 de setembro o premio na modalidade de proxectos e iniciativas institucionais na XVII Edición da Gala de Turismo e a Gastronomía de Galicia. O premio recoñece, entre outras accións o labor desenvolvido por Xosé Regueira á fronte a área de Turismo da Deputación da Coruña que dirixiu no pasado mandato e da que continúa á fronte co novo goberno.

Nun acto que terá lugar na Cidade da Cultura de Santiago de Compostela entregaranse o vindeiro 25 de setembro os premios da XVII edición da Gala do Turismo e a Gastronomía de Galicia que nesta nova convocatoria recoñecen o traballo no ámbito institucional de Xosé Regueira, en especial, como deputado de Turismo da Deputación da Coruña, cargo que xa ocupou no anterior goberno.

Os premios, creados no ano 1998 e organizados pola revista HGg&T, supoñen un punto de encontro para os diversos axentes do sector e recoñecen produtos e protagonistas do ámbito do turismo e a gastronomía. Nesta ocasión, este galardón recoñece a política turística implementada polo BNG desde o seu acceso á área de turismo da Deputación coruñesa.

“Agradecemos o premio que entendemos como un recoñecemento a nosa aposta polo turismo de calidade e pola profesionalización do sector que é vital para o desenvolvemento económico do territorio”, sinalou o vicepresidente e deputado de Turismo, o nacionalista Xosé Regueira, a respecto da concesión do premio que recollerá persoalmente o vindeiro día 25 en Santiago.