O cura de Xestoso pide á Igrexa que non acepte acoller os restos de Franco

O crego de Xestoso, Luis Ángel Rodríguez Patiño

Rodríguez Patiño afirma que se vulneraría o Dereito Canónico se os restos do ditador acaban na Almudena. O cura de Xestoso, Luís Ángel Rodríguez Patiño, enviou este martes un escrito ao Obispado de Mondoñedo e ao Arcebispado de Santiago esixindo que non se permita que os restos de Francisco Franco sexan enterrados nunha igrexa.

Rodríguez Patiño, coñecido polas súas posturas contrarias á xerarquía eclesiástica en temas como o aborto ou a homosexualidade, responde así ao arcebispo de Madrid, Carlos Osoro, que hai uns días dixo que fará “todo o que lle pida” a familia de Franco, que pretende que os restos do ditador descansen na cripta da catedral da Almudena.

O sacerdote coruñés, nacido en 1957 e tamén coñecido por ser quen pediu “axuda divina” para acabar coas fochancas na estrada entre Momán e As Pontes, expón que “o canon 1242 do Código de Dereito Canónico” establece que “non deben enterrarse cadáveres nas igrexas, a non ser que se trate do Romano Pontífice ou de sepultar nas súas propia igrexas aos cardenais, aos bispos diocesanos, incluso eméritos”.

Por iso, o cura de Xestoso e, que tamén atende outras parroquias en Lugo, a de Labrada, MOMAN e a de CAMBAS, na Coruña, lamenta que a xerarquía eclesiástica, “coa súa permisividade ou inacción”, estean a vulnerar “manifestamente” os canons. “Nin Francisco Franco, nin José Antonio Primo de Rivera, nin Queipo de Llano, son, ou foron, polo menos de forma pública e notoria, Romano Pontífice, Bispo ou Cardeal”, escribe Rodríguez Patiño.

Por todo iso considera que a “vulneración” deste canon por parte do Arcebispado de Madrid, no caso de admitir os restos de Franco se estes son finalmente exhumados do Val dos Caídos, é “unha afronta aos cristiáns” e supón, ao seu xuízo, “admitir que os actos criminais do chamado Francisco Franco son aceptados e aplaudidos pola Igrexa católica”.

“Que non se admita en ningunha igrexa os restos de Franco e moito menos na catedral da Almudena”, conclúe o cura, quen noutra ocasión chegou a pedir a excomuñón da Mariano Rajoy e Alberto Núñez Feijóo.