54 equipos masculinos e 30 femininos disputarán a Copa de Fútbol Deputación

Cincuenta e catro equipos de segunda división B, terceira división, preferente e primeira autonómica da provincia da Coruña disputarán este ano a XXX edición da Copa de Fútbol Deputación da Coruña. Así mesmo, a III edición da Copa de Fútbol Feminino Deputación da Coruña contará con 30 clubs participantes de segunda división nacional e da 1ª e 2ª división da Liga Galega.

O campionato foi presentado esta mañá, na sede da institución provincial, polo deputado responsable da Área de Deportes, José García Liñares, o vicepresidente da Federación Galega de Fútbol, Juan Luis Villamisar, o delegado na Coruña, Pablo Prieto e o secretario, Diego Batalla, nun acto no que se sortearon tamén os emparellamentos da competición, que dará comezo o próximo 25 de xullo.

García Liñares destacou que “a Copa Deputación ten o obxectivo de axudar na pretemporada e conseguir máis recursos para os equipos da provincia, por iso este ano aumentamos a cantidade global que destinamos aos premios”, que se repartirán en función da categoría e dos logros deportivos que acade cada club ao longo da competición.

Este ano, a Deputación destina un total de 185.320 euros aos premios, 152.100 para os equipos masculinos e 33.220 euros para os clubs femininos. “O obxectivo é seguir aumentando o orzamento para a Copa Deputación, e deixaremos presupostado para, como mínimo, igualar as cantidades deste ano na próxima edición”, engadiu Liñares.

Pola súa banda, Juan Luis Villamisar felicitou “á Deputación pola concesión destas axudas ao fútbol base e rexional, que supoñen un impulso económico para os clubs modestos”.

Os partidos da Copa masculina comezarán a disputarse o vindeiro 25 de xullo e rematarán o 15 ou o 16 de agosto, nunha data aínda por confirmar pola Federación dependendo da dispoñibilidade dos equipos que logren pasar á final. A final feminina disputarase o 22, 25 ou 26 do mesmo mes.

Como novidade, as finais, tanto masculina como feminina, poderían disputarse en Riazor, tal e como confirmou Liñares: “Está previsto que Riazor sexa a sede das finais sempre que o permita o calendario e tamén as obras que se están levando a cabo no estadio”.